Dili, 10 janeiru 2025 (SRP) – Família bot Ministeriu Interior, hala’o enkontru avaliasaun servisu ho funsionáriu sivis no PNTL ho tema “Konsolida Paz no Estabilidade Hodi Servi Povu ho di’ak liu”, ne’ebe hala’o iha Sentru Konvensaun Díli(CCD-Sigla Portugés), Eis Merkadu Lama.
“Hakarak agradese ba ita bot sira hotu, liuhosi avaliasaun ne’e bele halibur an hamutuk iha fatin ida ne’e hodi avalia progresu servisu sira iha tinan 2024. Iha buat lubuk bo’ot ida ne’ebé liu ona, ida ne’ebé di’ak kontinua la’o ba oin no ida lá diak buka atu hadi’ak liutan iha futuru hodi servi povu ida ne’e”, esplika Ministru Interior, Francisco da Costa Guterres, perante nia diskursu.
Nia dehan, ho avaliasaun dezempeñu institusionál ne’e ema hotu bele kontinua servisu ho responsabilidade ba ida-idak nia área, hodi kumpri obrigasaun atu hametin orden públika, hodi tane estabilidade nasionál ne’ebé importante ba asegura prosesu dezenvolvimentu nasionál.
“Ho tinan 2025 ne’e, husu funsionáriu sira atu iha hanoin Planu Asaun servisu saida mak atu hala’o ba oin, nune’e bele alkansa nia objetivu. Tanba ne’e hanesan servidor estadu tenke preparadu hala’o servisu ho profisionál no responsabilidade, tanba sei hasoru buat lubuk ida iha reformas, re-estruturasaun nune’e bele konsolida estadu ida ne’e ho di’ak liuhosi dezenvolvimentu ida ne’e ho paz”, afirma.
Maske nune’e Governante ne’e rekuñese sei iha buat barak mak presija kompleta liután, atu nune’e iha tinan ida ne’e funsionariu hotu iha papel no responsabilidade estratéjiku oinsa hametin orden públika hanesan aspetu krítiku iha prosesu konsolidasaun estabilidade nasionál.
Ezekutivu ne’e salienta, avaliasaun katak ita determina sistematikamente aspetu méritu, valór no importánsia husi ita hotu nia servisu bazeia ba padraun jerál ne’ebé di’ak hodi halo komunikasaun, koordenasaun no kooperasaun entre instituisaun tutela, superiór no sub-alternu sira.
Entertantu serimónia ne’e partisipa hosi Sekretáriu Estadu Protesaun Sivil, Domingos Mariano Reis, Komandante Jerál PNTL, Komisáriu Jeral Henrique da Costa, Segundu Komandante Jerál PNTL, Pedro Belo, Prezidente Autoriedade Protesaun Sivil, Diretór Jerais, Komandante Munisipal, Komandante Unidade, Diretór Nasionais no Xefi Departamentu sira tutela Ministériu Interior. #Bui/ Rival
