Tutuala, 04 dezembru 2023 (SRP) – Relasiona ho bailoro naruk ne’ebé afeta ba animál protejida sira, Ministru Interior, Francisco da Costa Guterres, Ph.D, akompaña hosi Komandante Komandu PNTL Munisípiu Lautem, Superitendente Polísia, Antonio Rego Fernandes no Autoridade Protesaun Sivíl Munisípiu Lautem, fornese bee ba rusa sira iha Ilha Jaco, Postu-Administrativu Tutuala, Munisípiu Lautem.
“Ohin ita hamutuk ho Autoridade Protesaun Sivíl no Guarda Florestál sira lalin bee ba tau iha fatin ne’ebé propriu ona inklui observa diretamente rusa tolu ne’ebé foin mate iha oras balu liuba tanba bailoro naruk no korpu Bombeiros sira hakoi hotu ona”, esplika Francisco Guterres, iha Illa Jaco, (03/12/2023).
Tuir nia, rusa balun mate iha Ilha Jaco ne’e nudar problema natureza no mudansa klimatika hodi fó impaktu ba balada fuik sira nia hahan mós menus.
“Tuir dadus Guarda florestál katak hahú hosi fulan ha’at ikus mai to’o loron ohin iha rusa hamutuk 71 maka mate ona. Ida-ne’e laos deit kestaun bee maibé ita mós konsidera katak haree ba númeru populasaun rusa hahú aumenta nune’e hahan iha Illa Jaco la sufisiente ona ba sira, tanba agora ita tama iha tempu bailoron ne’e duni du’ut sira ne’ebé moris iha ne’e mós hahú maran nune`e prezudika ba rusa sira susar atu konsumu hahan ne’ebé naton”, fundamenta.
Korpu Bombeiro sira ense bee iha tanki ne’ebé antes ne’e prepara ona iha ne’ebá hodi fó ba rusa
Governante ne’e hatutan, Illa Jaco riku ho valór istóriku kulturál no-mós natureza balada fuik ne’ebé bele atrai turista sira hodi mai vizita, nune’e presija iha kolaborasaun diak hodi bele konserva no proteje hamutuk.
“Ita orienta ona Komandu Munisípiu Lautem hamutuk ho Autoridade Protesaun Sivíl atu servisu hamutuk ho guarda florestál sira. Agora buat ne’ebé ita bele halo maka fasilita no fó atensaun maka tula bee ba ense iha tanki ne’ebé antes ne’e prepara ona”, subliña.
Iha okajiaun ne’e Ministru Interior hateten sei buka solusaun lalais hodi sosa mangueira polypipe metru 1500 atu dada bee hosi Valusere mai iha Illa Jaco hodi mantein sustentabilidade bee ba bidón 5 ne’ebé antes ne’e hetan apoia hosi lider nasionál Xanana Gusmão iha tinan 2019 liuba. # (Fatinha/AX).
