Dili, 08 abril 2024, (SRPM)-Ministru Interior, Francisco da Costa Guterres,Ph,D, akompaña husi Sekretáriu Estadu ba Protesaun Sivil, Domingos Mariano Reis, konvoka reuniaun ida ho estrutura Autoriedade Protesaun Sivíl (APC) husi nasionál no munisípal hodi ko’alia kona-ba Lei Orgánika Autoriedade Protesaun Sivíl ne’ebé foin aprova husi Konsellu Ministru semana kotuk.
“Ohin ita informa ba estrutura Autoriedade Protesaun Sivíl husi nasionál no munisípiu sira kona-ba prosesu reforma sira ne’ebé mak Governu halo, inklui atu re-organiza estrutura Autoridade Protesaun Sivíl ne’e rasik, hodi nune’e sira bele entende oinsá Governu nia servisu. Ami mós informa desizaun sira ne’ebé foti iha Konsellu Ministru ba nomeasaun no mudansa, nomós mantein rona atualizasaun progresu servisu kargus xefia sira, nomós mantein nafatin sira hodi hala’o servisu operasionál, hodi hato’o resposta ne’ebé lalais iha servisu sira wainhira dezastre sira mosu” esplika Ministru Francisco ba jornalista sira iha edifisiu Protesaun Sivíl, Caicoli, Dili.
Governante ne’e mós revela kona-ba mudansa radikál ba estrutura, aleinde ba kestaun atendimentu sira no Governu mós haree ba nesesidade urjenti hamosu tán diresaun foun ne’ebé mak bele atende lalais situasaun emerjénsia, hanesan dezastre sira wainhira akontese udan no rai halai sira, hodi ajuda komunidade sira evakua ba iha fatin sira ne’ebé seguru.
Ezekutivu ne’e mós apresia no kongratula SEPS no estrutura sira ne’ebé durante ne’e, halo servisu makas no halo diskusaun kona-ba Lei Orgánika ne’e hetan aprovasaun husi Konsellu Ministru.
Iha fatin hanesan, Sekretáriu Estadu ba Protesaun Sivil, Domingos Mariano Reis, salienta liu tan katak, husi reuniaun ida ne’e atu desimina Lei Orgánika Autoriedade Protesaun Sivíl nian, ne’ebé iha semana kotuk hetan aporovasaun ona husi Konsellu Ministru.
Nia dehan, estrutura Autoriedade Protesaun Sivíl importante, hodi hatene kona-ba organigrama autoriedade protesaun sivíl nian, ne’ebé sei iha mudansa lubuk ida, nune’e bele aumenta tán Diresaun foun ne’ebé importante hanesan Diresaun Nasionál Prevensaun no Mitigasaun, Diresaun Nasionál ba Rekooperasaun no mosu mós Gabinete Unidade iha Munisípiu sira.
Reuniaun ne’e partisipa marka prezensa husi, Prezidente Interinu APC, Komandante Operasaun Nasionál APC, Komandante Operasaun APC munisipiu 14, inklui RAEOA, Diretór Gabinete, Diretór Nasionál no Xefe Departamentu sira. # (Bui/Est/Edw).
