Dili, 12 marsu 2024 (SRP) – Ministru Interiór (MI), Francisco da Costa Guterres, Ph.D, simu vizita husi Sekretáriu Jerál organizasaun g7+ ho ekipa, hodi ko’alia kona-ba Programa Edukasaun Sívika iha nivel nasionál ne’ebé sei aprezenta ba Konsellu Ministru (KM) iha tempu besik.
“Ohin ami husi g7+, marka aúdensia ho Ministru Interior, iha pontus rua ne’ebé importante hodi ko’alia, bazeia ba MoU ne’ebé ami asina ona, ba iha programa edukasaun sívika iha nível Nasionál. Tanba ne’e ami-nia ekipa mai hodi atualiza progresu servisu nian nomós hodi halo preparasaun aprezenta ba iha Konsellu Ministru iha tempu badak kona-ba edukasaun sívika, liuliu hametin paz, estabilidade iha ita-nia rai”, esplika Sekretáriu-Jerál g7+, Helder da Costa, hafoin remata enkontru ne’e iha Ministériu Interiór, Vila-Verde, tersa (12/03/2024).
Tuir nia, kooperasaun servisu hamutuk parte rua nian sei foka liu iha área prevensaun konflitu liu-liu atu promove dame liuhusi atividade diálogu no rekonsiliasaun iha komunidade territóriu timór laran tomak.
“Ami mós ko’alia ho Ministru Interiór, kona-ba inisiativa di’ak ida hodi lori ita-nia veteranus sira ba iha sidade Kigali nudar kapitál hosi nasaun Rwanda ne’ebé agora daudaun sai paiz avansadu tebes iha Africa nian tanba sira-nia istoria hanesan mós iha ita timor. Sira mós atravesa periodu defisil tanba iha funu entre sira mas agora sira konsege hametin fali rekonsiliasaun, promove paz, justisa nune’e mak sira bele halo dezenvolvimentu durante dekada rua nia laran no ida-ne’e sai inspirasaun ba ita”, subliña.
Nia dehan, hanesan nasaun frájil no afetadu husi konflitu daudaun ne’e, g7+ mós dezenvolve hela hanoin di’ak ida ho envolvimentu Guvernu no entidade oi-oin atu buka aprende hosi nasaun membru sira.
“Alem de veteranus sei lori mós komponente importante sira hanesan prezidente Kámara Komersiu Industria (sigla;CCI), Sekretáriu Estadu Asuntu Toponímia no Organizasaun Urbana atu oinsá bele jere jestaun lixu iha sidade Díli tanba ema iha sidade Kigali sira nia jestaun zero plástiku”, fundamenta.
Hatan ba ida-ne’e, Ministru Interior, kongratula ho idea hirak ne’e no konkorda katak, organizasaun g7+ ne’e relevante liu no iha kbi’it atu hetan dame no dezenvolvimentu iha nasaun sira ne’ebé afetadu husi konflitu, liuhusi advokasia konjunta, aprende hamutuk no kolabora malu nune’e bele promove paz no estabilidade iha nasaun membru g7+ sira hotu. # (Rival/Bui/AX)
