Díli, 13 jullu 2023 (SRP) – Ministru Interior, Francisco da Costa Guterres, Ph.D, hala’o vizita kortezia ida ba Postu Integradu 001 Servisu Migrasaun, Aeroportu Internasional Prezidenti Nicolau Lobato, Administrasaun Servisu Portu Tibar no Portu Dili hodi haree rasik kondisoens atendementu husi membru Servisu Migrasaun nian iha balkaun sira, nune’e Governu liuhusi Ministériu Interiór bele iha kbiit atu buka solusaun.
“Ohin ita mai haree espasu no ekipamentus servisu migrasaun ne’ebé instala iha postu laran hodi analiza problemas hirak ne’ebé iha hodi kria kondisaun atu nune’e pasajeiru sira bele haree servisu di’ak, atendimentu di’ak liuhosi migrasaun tanba imajen nasaun nian ne’e iha Aeroportu no iha no pontu entrada sira seluk”, esplika Ministru Interior, Francisco Guterres, ba jornalista sira iha Portu Tibar, kinta (13/07/2023).
Tuir nia, migrasaun hanesan imajen ida hodi hatudu ba mundu seluk tanba pasajeiru sira atu haree ema atendimentu di’ak ou lá di’ak ne’e liuhusi Migrasaun rasik.
“Presiza haree didi’ak migrasaun ne’e hodi kria kondisoens, ekipamentu sira ne’ebé mak iha ne’e, sei bele kala’e hodi ajuda nafatin sira, hala’o sira-nia servisu sira no serbi ema ho didi’ak, nune ema bele iha impresaun di’ak ba rai ida-ne’e”, subliña.
“Agora Governu iha ona planu atu haree no rehabilita didi’ak fali Aeroportu ida-ne’e entaun wainhira Aeroportu rehabilitadu ona maka Migrasaun nia espasu ka fatin ba servisu sei di’ak hodi bele halo atendimentu ida di’ak liután”, afirma.
Kestiona kona-ba instalasaun sistema jestaun fronteira ne’ebé instala ona ho naran MIDAS (Migration Information and Data Analysis System), ezekutivu ne’e afirma katak, instalasaun sira ne’e pozitivu tebes.
“Ha’u haree katak, Migrasaun ohin ko’alia instalasaun sira ne’e di’ak tanba bele rezolve no identifika ema ho dadus sira ne’e bele tau iha server Nasionál hodi kontrola nafatin. Sistema ida-ne’e hanesan prosesu kontinuasaun hosi sistema jestaun fronteira uluk nian ho naran BMIS (Border Management Information System)”, salienta.
Enkuantu sistema rua ne’e nia funsaun hanesan deit tanba bele ajuda maneja no alerta koneksaun sistema data base iha portu entrada no aeroportu hodi rekolla informasaun no análiza dadus servisu migratoriu nian inklui halo monitorizasaun elektronikamente ba pasajeiru sira ne’ebé tama no sai liuhusi postu integradu Migrasaun nian, iha territóriu nasionál.
Ezekutivu ne’e mós fó hela intrusaun ba Diretór Jerál Servisu Migrasaun sira atu halo koordenasaun diak nune’e bele reativa fali fatin sira ne’ebé mak foin instala sira ne’e atu ativu lalais hodi serve pasajeiru sira.
“Ita sei haree maknizmu ruma hodi tau ekipamentus iha pontu entrada sira hodi fasilita servisu sira nomós sei halo planeamentu integradu ida hodi hatene nesesidades ba kolokasoens pesoais no-mós halo mapa pesoál”, tenik tan.
Iha biban ne’e, depois de remata vizita iha Migrasaun Aeroportu Nicolau Lobato no Administrasaun Portu Tibar, Ministro Interior ne’ebe hetan akompañamentu hosi asesór tékniku no eis komisáriu PNTL sira mós hala’o vizita ba Postu Migrasaun ne’ebé koloka iha Aportil.IP Portu Dili nian. # Ekipa Media-MI
