Maubara, 16 dezembru 2023 (SRP) – Instituisaun tutela Ministériu Interior, Sekretaria Estadu Protesaun Sivíl ho estrutura Komandu Jerál PNTL, hahu halo konsultasaun hodi identifika, avalia no realiña estratejia servisu seguransa interna no Planu Estratejiku Dezenvolvimentu tinan 2011-2030.
Iha abertura Ministru Francisco fó komentáriu ba Planu Estratéjiku no fó korajen atu tau atensaun ba konseitu estratéjiku seguransa no halo reflesaun jerál kona-ba servisu seguransa interna nian to’o ohin loron.
“Workshop ne’e importante tebes para halo revizaun ba Planu estratéjiku 2011 nian, buat barak maka la konduz ona ho situasaun atuál iha pais ne’e. Tinan 2017 mai ne’e ita fokus liuba buat kik sira no la halo planu estratéjiku para alkansa objetivu finál. Tanba ne’e ohin konvida diresaun tutela mai iha ne’e hodi haree fali para aponta hodi apoiu ba servisu seguransa nian nune’e se de’it mak mai troka mós ninia dalan ne’e metin hela tanba ita prepara ona kaderizasaun no konsolida estrutura hodi lao ba oin”, dehan Francisco Guterres, iha salaun Madre Carmelita, Maubara-Fatubesi ne’ebé lokaliza iha Aldeia Delisowati, Suku Vaviquinia, Postu-Administrativu Maubara, Munisípiu Liquiça.
Tuir nia, presija tebes realiña Planu Estratéjiku hodi reflete aspirasaun povu Timor nian relasiona ho kriasaun nasaun ida-ne’ebé forte no prosperu atu fó inspirasaun ba mudansa sira no-mós apoia aprosimasaun koletiva sira iha futuru ida di’ak liu.
Ministru Interior foto hamutuk ho komandante PNTL, kargu diresaun xefia inklui asesór sira
“Ohin hanesan loron dahuluk ita halo workshop ne’e hodi aprezenta mós kona-ba konseitu planu estratéjiku, halo reflesaun kona-ba Prinsípiu Matadalan sira, diskusaun Jerál kona-ba Servisu Seguransa interna nian, Vizaun, Misaun no Ambiente Estratéjiku Servisu ita nian, presiza mós halo identifikasaun no avaliasaun ba dezafiu seguransa ne’ebé ita sei hasoru hodi responde ba nesesidade sosiál populasaun nian no promosaun dezenvolvimentu umanu nian”, fundamenta.
Iha okajiaun ne’e, Ministru Francisco husu durante halo diskusaun presiza halo analiza no Formulasaun hodi defini prioridades, realiña fila fali Estratejia Seguransa Interna nian ba tinan 2030 no ikusliu halo kedas avaliasaun no evaluasaun ba prosesu semináriu refere.
Marka prezensa iha semináriu ne’e envolve, Prezidente Autoridade Protesaun Sivíl, Diretores Jerais, Diretores Nasionais, Komandante Komandu PNTL Munisipál inklui Komandu rejionál no-mós asesór nasionál sira. Entretantu semináriu ne’e realize husi Diretór Gabinete Planeamentu Estratéjiku # no estrutura tomak. (Fatinha/Oscar/AX).
