Dili, 28 Dezembru 2023, Ministru Interior, Francisco da Costa Guterres, PhD ho Sekretariu Jerál g7+ Helder da Costa asina akordu/MOU ho Organizasaun Internatisionál g7+, hodi hametin kooperasaun iha servisu Promove Edukasaun Sívika, Prevensaun Konflitu no Promove Paz iha Nasaun Timor-Leste.
“Ha’u hanoin servisu hamutuk ho G7+ ne’e, servisu ida ne’ebé la’o kleur ona iha mekanismu servisu ida-ne’e. Tanba ne’e mak formaliza tiha ita bele la’o di’ak liu hodi konsentra atividade sira iha baze ne’e”
Iha oportunidade ne’e MI mós elojia G7+ hanesan Organizasaun Internasionál ida ne’ebé, servisu atu promove paz liuliu iha rai ne’ebé mak hamosu konflitu.
Iha sorin seluk, MI mós husu ba G7+ bele ajuda Ministériu Interior hodi hala’o servisu iha baze hodi promove paz. Tanba prioridade iha IX Governu Konstituisionál ida mak hodi promove paz iha komunidade nia leet, hodi bele motiva dezenvolvimentu ekonomiku iha nasaun ida-ne’e.
Governante ne’e esklarese, Governsaun ida-ne’e, ajuda nafatin Ministériu Interior prepara Planu ne’ebé mak di’ak, hodi hala’o servisu promove nafatin paz.
Ezekutivu ne’e relata katak, iha tinan-2024, MI mós iha Planu hodi promove no instala, komisaun nasionál ida kona-ba edukasaun sívika, komisaun interministeriál ne’ebé sei kompostu husi Ministériu balun, komunidade sira, hodi tun ba baze hodi identifika servisu sira iha komunidade no suku, nune bele fó benefisiu di’ak ba komunidade sira iha area remotas.
“Ha’u koordena ona, iha parte Ministériu Interior nian, hodi halo planu ba iha kriasaun komisaun ne’e rasik, wainhira envolve ona Ministériu sira, hodi halo prosesu. Tanba iha orsamentu Ministériu nian, sei envolve mós Ministériu Estatál nsst”.
Ministru Interior ho Sekretariu Jerál g7+ Helder da Costa halibur ideia kona-ba preparasaun Planu hodi hametin paz iha futuru
Iha fatin hanesan, Sekretariu Jerál g7+, agradese ba Ministru Interior hodi bele fó konfiansa ba g7+ nu’udar parseiru estratéjiku ba tinan lima mai, iha área edukasaun sivika, prevensaun konflitu no formasaun ba paz, hodi tun ba baze.
“Liuhosi kooperasaun ida-ne’e, ami bele halo sosializasaun hodi promove paz iha rai laran no fahe esperiénsia. Ho nune’e mak g7+ ho onra bo’ot fó previléjiu bele asina MOU ida-ne’e”.
Sekretariu Jerál g7+ husu ba Ministeriu Interior atu konta mos g7+ nia modestu kontributu promove paz iha rai seluk, no Timor-Leste mos bele dada rai seluk bele mai aprende husi Timor nian.
” Ita mós lakleur tan atu tama ba ASEAN entaun, primeiru estar ita tenke kondisiona ita-nia rain hakmatek, nune’e ema bele mai investe no halo atividades iha multi sektorais, nune’e ita mós bele hakat ba ASEAN ho korajen no fiar a’an metin,” tenik nia.
Nia sublina, husi g7+ sei delega Doutor Feliz Piedade nudar pontu fokál atu ba ajuda ekipa husi MI ne’ebé sei elabora kriasaun, no estabelesimentu komisaun interministeriál kona-ba edukasaun sivika, g7+ preparadu atu kontribui ba programa promove paz iha rai laran.
Seremónia ohin loron engloba atividade 3, primeiru asina Momerandum of Understanding (MoU) hodi tun ba baze koalia ho maluk sira para halo prevensaun ba konflitu, halo rezolusaun konflitu, buka atu promove paz nune’e rai ne’e hakmatek hodi dada investidór sira bele tama mai TL.
Segundu sei halo edukasaun sívika, sei forma ekipa konjunta ida entre liñas ministeriais ne’ebé lidera husi MI, g7+ hamutuk ho entidade relevante sira hodi bele promove paz koletiva.
Husi G7+ nia parte iha tinan-2024 ba oin, sira prontu no kompremete katak, sei servisu hamutuk ho Ministériu Interior, no apoiu máximu hodi nune’e parseiru sira husi nasaun seluk bele mai investe nia servisu iha rai ida-ne’e iha atividade multilaterais hodi hakat ba iha ASEAN ho fiar an nafatin.
Atividade ne’e konta ho prezensa husi asesór nasionál sira, Diretora Nasionál Prevensaun Konflitu Komunitaria (DNPKK), Lidia Lopes de Carvalho no ekipa staff sira husi G7+. #Fatinha e Liza Barreto.
