Oe-Cusse, 22 maiu 2025 (SRP)— Komandu Polisia Nasionál Timor-Leste (PNTL) Rejionál Administrativu Espesiál Oekusi Ambenu (RAEOA), realiza serimónia empozisaun deviza promosaun tranzitóriu no promosaun por antiguidade iha ba membru PNTL 138 iha Suku Costa, Sub Rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Serimónia ida-ne’e, simu ho drum band husi estudante Kolejiu Santo António Oecusse no fó hatais Tais ba Ministru Interiór (MI) Francisco da Costa Guterres no Komandante Jerál PNTL Komisáriu Herinque da Costa ho ninia ekipa, nuudar simbolu kulturál.
Atividade lao iha udan nia laran, hodi promove deviza ba membru PNTL sira ho totál 138 inklui Unidade Polísia Fronteira (UPF) Kompaña Charly nain Ha’at (4) no BMOP Posto Oe-cusse nain ne’en (6) ho kompozisaun maka hanesan: Ofisiais Superior nain ne’en (6), Inspetór Xefe nain lima (5), Inspetór nain Hitu (7), Inspetór asistente nain ruanulu-resin-sia (29), Sarjentu Xefe nain ruanulu-resin-sia (29), Primeiru Sarjentu nain Limanulu-resin-lima (55), Ajente Xefe nain Sanulu (10).
Ministru Interior, iha ninia diskursu, hateten membru sira merese hetan valorizasaun dunik husi sira-nia servisu nee’be halo ba rai ida ne’e.
“Empozisaun diviza mai atu valoriza ita-boot sira-nia servisu, merese atu hetan valorizasaun ne’e, tanba ariska imi-nia vida , hodi bele hametin paz ho estabilidade iha rai ida-ne’e. Imi hamrik defende instituisaun ida-ne’e, imi-nia lealdade ba instituisaun ida-ne’e, imi merese dunik husi Governu atu fó valór. Ita-boot sira balun mós antes rai ne’e ukun aan, ita-boo sira luta makas, prosesu klandestina no armada”, dehan MI.
Governante ne’e agradese tebes ba Asosiasaun Espoza Espozu PNTL sira-nia apoiu makas mak halo instituisaun ida-ne’e bele forsa. Liuhusi kada membru PNTL hodi transforma sira hodi hala’o servisu ho profésionál, atu nune’e bele hametin instituisaun no estadu ida-ne’e.
“Agradese tanba imi kompriende hodi dok husi membru PNTL wainhira imi presiza lós sira, iha selebrasaun boot, hanesan natál tenki selebra mesak, hodi fó apoiu ba sira halo seguransa ba povu ida-ne’e”, tenik tan.
Ezekutivu ne’e aprofunda katak iha 2023 no 2024, foku liu atu hadia PNTL nia moris, hodi PNTL sira servisu di’ak liu tan no mantein kooperasaun didi’ak ho autoridade lokál sira hotu.
Iha okaziaun ne’e, membru governu ne’e hato’o obrigadu ba komandu Jerál, komandu munisípiu, postu sira no-mós ba unidade sira hotu, ne’ebé mak servisu makas, sira fó apoiu ba komisaun promosaun tranzitóriu hodi provedensia dadus hotu-hotu hodi promosaun ne’e lao tuir nia regras. #Rival
