MAKIKIT KANSELA TRANSAKSAUN ILEGÁL SIGARRU HOSI FRONTEIRA

Dili, 10 outubru 2023 (SRP) – Komandu Polisia Nasional Timor Leste Munisípiu Dili, liuhosi servisu informasaun Makikit, halo vizilánsia hodi prende sigarru illegál no asegura suspeitu joven mane ida ho naran inisiál QN, tinan 27 hosi Hauba, Postu-Administrativu Bobonaro, Munisípiu Bobonaro.

Sigarru hirak ne’e hatama ilegál hosi área fronteira Indonézia no Timór-Leste hodi fa’an tutan iha merkadu Taibese.

Durante halo atividade suspeitu QN uza kareta privadu hodi fa’an sigarru kalan-kalan iha merkadu Taibese no-mos merkadu sira seluk ne’ebé sai ona kliente permanente.

Evidénsia ne’ebé polísia prende maka hanesan sigarru ho marka surya 12 hamutuk pakote 159 no sigarru marka Thanoes pakote 402 nune’e totál hamutuk 561 pakotes, iha loron segunda kalan mais a menus oras tuku 11:55.

Hafoin asegura ekipa servisu Makikit kontatu kedas ba Eskuadra PNTL Nain-Feto, mai lori suspeitu ba Komandu Munisipiu Dili hodi halo detensaun no kontinua halo prosesa ba Ministériu publiku tanba PNTL nia dever maka kaptura no halo identifikasaun enkuantu ba kazu krime nia sei prosesa ba tribunál. #AX