Dili, 18 abril 2024 (SRP) – Komisaun Téknika jogus CPLP nian ne’ebé lidera hosi George Carvalho, hamutuk ho komitiva hasoru malu ho Ministru Interior, Francisco da Costa Guterres, Ph.D, hodi aprezenta kriteriu no rekizitu sira ba implementasaun Jogu Desportu CPLP nian iha tinan 2025.
Koordenadór Desportu CPLP, George Carvalho, hateten hafoin Rezolusaun 10/2023, Deklarasaun finál XIV Konferensia Ministru Juventude no Desportu CPLP nian, ne’ebé hala’o iha Luanda, Angola, iha loron 30 Novembru 2023, konfirma ona atu realiza XII Jogu Desportu CPLP nian iha Timor-Leste.
“Ohin ami mai hasoru Ministru Interior, hodi aprezenta rekezitu balu no avalia kondisaun sira implementasaun jogus desportu CPLP ne’ebé primeira vez sei halo iha Dili no Ermera, hahú husi 17 to’o 27 Jullu 2025”, esplika George Carvalho, hafoin remata enkontru ne’e iha Ministériu Interior, Vila-Verde, kinta ne’e.
George hateten, agora daudaun sira harii tiha ona Komisaun Téknika Akompañamentu (CTA;sigla protuges), ne’ebé envolve membru sira husi nasaun oin-oin CPLP nian ho objetivu atu apoia jogu Desportu CPLP iha timor.
“Agora dauduan ami sei servisu hamutuk ho Governu Timor-Leste hodi halo preparasaun ba jogu sira ne’e liu-liu ba kondisaun lojístika, transporte desportu no apoiu seguransa”, subliña.
Nia hatutan, kompetisaun hirak ne’e envolve modalidade 8 mak hanesan, antagol ba ema ho defisiénsia sira, futubol, basketbal, volleybal, taekwondo, karate no tenis.
Iha biban ne’e, Ministru Interior, Francisco da Costa Guterres, lori Governu nia naran fó apoiu totalmente no kompromete atu promove partisipasaun atleta hotu.
Governante ne’e konsidera, jogu CPLP hanesan eventu multi-sport ne’ebé envolve estadu-membru hotu-hotu iha organizasaun nia laran no kompetisaun ida-ne’e nia objetivu maka atu hametin solidariedade entre atleta sira husi nasaun membru sira hanesan Portugal, Cabo Verde, Angola, Mozambique, Guine-Bissau, Brazil, São Tome e Principe no Guine Equatorial.
Entretantu, delegasaun hosi CPLP ne’e envolve Prezidénsia Konferénsia Ministru CPLP nian hosi Angola, Antonio Manuel da Luz, no hetan akomapañamentu hosi Diretór Jerál Desportu MJDAK, João Rodrigues hamutuk ho nia asesór Nelson Silva. # Ekipa SRPM
