KM DESKUTE PLANU ASAUN ATU HADI’A SETÓR JUSTISA IHA TIMOR-LESTE

Dili, 05 juñu 2024 (SRP) – Ministru Interiór (MI), Francisco da Costa Guterres, Ph.D, partisipa reuniaun Konsellu Ministru (KM), hamutuk ho membru IX Guvernu Konstitusionál, ne’ebé prejidi husi Primeiru-Ministru (PM) Kay Rala Xanana Gusmão, iha sala reuniaun Konsellu Ministru Palásiu Governu.

Iha sorumutuk ne’e, Konsellu Ministru halo diskusaun ba asuntu oinoin, inklui diskute aprezentasaun husi Koordenadora Grupu Traballu ba Reforma Setór Justisa, Dra. Lúcia Lobato, kona-ba planu asaun atu hadi’a setór Justisa iha Timor-Leste.

Grupu Traballu ba Reforma Setór Justisa ne’e aprezenta ona roteiru ida atu hadi’a setór justisa, trasa prioridade no identifika rekomendasaun no medida lubuk ida ne’ebé Governu tenke adota hodi hametin sistema judisiál.

Konsellu Ministrus debate rekomendasaun sira ne’ebé aprezenta, no reafirma ninia apoiu ba Grupu Traballu ba Reforma Setór Justisa atubele kontinua sira-nia serbisu ho objetivu atu adota reforma sira ne’ebé presiza.

Ministru Transportes no Komunikasoins, Miguel Manetelu, halo aprezentasaun ida kona-ba pontu situasaun kabu submarinu fibra ótika nian, ne’ebé prevee sei hala’o operasaun iha tinan ida ne’e nia-rohan.

Konsellu Ministrus agradese ba empeñu ekipa nian, no delibera hodi atribui ba repetidores kabu submarinu naran hosi martires balun Timor-Leste nian, hanesan Maria Udu Bele “Maria Tapó”, Rosa Bonaparte Soares “Muki”, Dulce Maria da Cruz “We-we”, Fernando de Araújo “La-sama”, Agustinho do Espírito Santo, José da Silva, Venâncio Ramos Amaral Ferraz no Dinis Carvalho da silva “Nelo Kadomi Timor”. #REMATA