HAFOIN SIMU POSE, MI FOUN SEI REVE ESTATUTU PNTL

Dili, 03 jullu 2023 (SRP) – Prezidente Repúblika (PR), Jose Ramos Horta, fó pose ba Francisco Guterres, PhD, nudar Ministru Interior foun hodi troka Jenerál Taur Matan Ruak ne’ebé antes ne’e nudar Ministru Interior iha VIII Guvernu Konstitusional. Seremónia tomada de pose ne’e hala’o iha Palasiu Prezidente, Nicolau Lobato, Aitarak Laran.

Hafoin simu pose Ministériu Interior foun ne’e promete sei hadia estututu Polísia Nasionál Timor-Leste (PNTL) sai diak liután liu-liu haree kona-ba implementasaun rigorozu ba profesionalizasaun Polísia nian.

“Karik ita hakarak haruka Polísia sira ne’ebé mak idade to’o ba reforma tenke reforma ho dignu kria kondisoens ba sira ho di’ak tanba ema sira ne’e sira-nia vida tomak dedika ba iha Polísia no atu servi povu ida-ne’e liuhusi kestaun seguransa. Entaun ida-ne’e maka prioridade ne’ebé ami tenke haree uluk depois mak ami reve tán sira seluk ne’ebé mak sai obstaklu hodi PNTL halao nia servisu”, esplika Ministru Interior, Francisco da Costa Guterres, ba jornalista sira iha palásiu Prezidente, Aitarak Laran, sabadu (01/07/2023).

Nia dehan, ho prioridade ne’ebé iha sei kria kondisoens sufisiente ba PNTL inklui kestoens legais hodi halo revizaun ba lei hotu iha loron 100 nia laran.

“Kona-ba PNTL sira ne’ebé mak obrigatoriamente tama ba reforma ita tenke hatuur fila-fali tanba iha kestoens balu ita presija hadi’a antes sira bele tama reforma atu ita bele fó sira-nia Estatutu ida ne’ebé mak dignu ba sira”, afirma.

Alende PNTL, Ministru Interior Francisco Guterres mós informa sei haree ba enkuadramentu legal Protesaun Sivil no-mós Diresaun Jerál Servisu Migrasaun nian. #AX