Dili, 11 jullu 2023 (SRP) – Guvernu liu hosi Ministru Interior (MI), Francisco da Costa Guterres, PhD akompaña husi Komandante Jerál PNTL Komisáriu Jeral, Henrique da Costa no Segundu Komandante Jerál PNTL Komisáriu Pedro Belo, hala’o enkontru ho membru reformadu hosi instituisaun Polísia Nasionál Timor-Leste hamutuk 158 ne’ebé fila ona bá vída sivíl tanba idade kompleta ona tinan 60.
“Ha’u hanesan Membru Governu ne’ebé mak tutela hela mai iha seguransa, Lei no Orden ne’ebé mak iha sei ezekuta no hatene loloos prosesu sira ne’ebé akontese. Agora iha kontextu apozentasaun problema sira ne’ebé akontese tenke tuir regras no lei nune’e bele iha prosesu ne’ebé hanaran, tranzisaun ba iha apozentasaun, nune iha siklu foun ida mai mós akompaña tuir regras ida-ne’e”, esplika Francisco Guterres, durante halo enkontru ne’e, iha aula Sentru Formasaun Polísia Comoro.
Tuir nia, asuntu ida-ne’e sei lori ba Konsellu Ministru atu halo debate nune’e bele hasai dezijaun ruma hodi rezolve.
“Primeiru-Ministru preokupa ho situasaun sira hanesan ne’e, forsa ho polísia ne’e hanesan pesoas únika ida iha sosiedade nia laran ne’ebé ita tenke sente previlejiu. Tanba estadu investe ba Ita bo’ot sira ne’e barak, ho koñesimentu espesializadu ne’ebé espesífiku, servisu iha área ne’ebé sensitivu, iha situasaun saida deit, ita boot sira kria paz no sai distribuidór ba iha Komunidade rasik. Agora dadaun haree hela prosesu ida-ne’e, sei lori preokupasaun ida-ne’e ba iha konsellu Ministru, sei foti desizaun ida klaru, no sei halo rekoñesimentu ida”, dehan Francisco Guterres.
Governante ne’e afirma, presiza retífika prosesu ne’e ho didiak hodi nune ba oin bele iha konsiderasaun ba malu.
“Sei enkontru fali ho Komandu Jerál no inspetores hotu hodi haree, tenke la’o tuir regras no estatutu sira tuir mós lei Jerál apozentasaun nian atu rekoñese polísia ida wainhira nia sai nune iha papel ida nia nafatin kontribui ba komunidade no estadu”, subliña.
Membru PNTL 158 enkontru ho MI iha AKPOL
Governante ne’e husu ba ajente no reformadu sira ne’ebé reforma ona atu iha nafatin prinsípiu tau papel importante ida mak tenke iha ligasaun nafatin ho komunidade sira, mantein nafatin disiplina, tanba estadu no Governu sei hatur fatin ne’ebé seguru hodi kontribui ba dezenvolvimentu nasaun ida-ne’e nian.
Reuniaun ne’e partisipa husi Eis Komisáriu PNTL sira, Komandante Jerál PNTL, Segundu Komandante Jerál PNTL inklui membru polísia reformadu sira. Ekipa Media-MI
