Dili- 23 fevereiru 2024 (SRP)- Embaixadór Japaun mai Timor-Leste, Tetsuya Kimura hala’o vizita kortezia ho Ministru Interior, Francisco da Costa Guterres, Ph.D, iha edifisiiu Ministériu Interior Vila-Verde Dili hodi koalia kona-ba apoiu no kooperasaun seguransa marítima iha Timor-Leste.
Objetivu husi vizita ne’e hodi koalia kona-ba apoiu kooperasaun no kapasitasaun ba rekursus umanus ba Polísia Nasionál Timor-Leste.
Diplomata salienta katak agora daudaun governu Japaun iha planu sei ajuda róo ha’at ba estadu Timor-Leste atu bele fasilita atividade iha area marítima, no sei fó kapasitasaun ba iha instituisaun PNTL atu bele utiliza ro’o ne’ebé sei oferese ba estadu Timor liuhusi Ministériu Interior.
“Ohin ami mai iha ne’e hasoru malu ho Ministru Interior, hodi koordena kona-ba apoiu ro’o 4 ba governu Timor-Leste liuhusi Ministériu Interior no sei fó kapasitasaun rekursu umanu ba membru Polísia Marítima nian. governu Japaun hakarak promove konseitu ne’ebé Timor-Leste merese hetan iha pasífiku.
No konseitu ida-ne’e atu promove navigasaun livre kona-ba papél konetividade hodi asegura dezenvolvimentu ekonómiku iha nasaun ne’e. Tan ne’e iha fatin hanesan ne’e ami tau fali seguransa marátima”, esplika, Tetsuya Kimura, hafoin remata enkontru ho Ministru Interior, iha resintu Vila-Verde, sesta, (23/02/2024).
Embaixadór Japaun mai Timor-Leste, Tetsuya Kimura ho ekipa hala’o sorumutu ho Ministru Interior, Francisco da Costa Guterres.
Embaixadór ne’e haktuir, ha’u mai iha ne’e hodi haforsa ami-nia koopersaun no deskuti kona-ba problema seguransa marítima, pas no estabilidade, no hametin liután liña koordenasaun iha area industria sira seluk tán iha futuru.
“Ida-ne’e hanesan projetu korporasaun daruak nian, ami espera katak prosesu ne’e sei susesu iha Ministériu Interior. Entaun kona-ba ne’e ha’u ko’alia ho Ministru oinsá mak ami bele koopera hodi kapasita polísia marítima no ami esplika oituan kona-ba esperiénsia di’ak ba prosesu hotu relasiona ho kapasitasaun ba polísia marítima iha territóriu nasionál.
Aleinde ida-ne’e, iha sorumutu ne’e Ministru Interior mós husu apoiu ba governu Japaun kona-ba preparasaun vizita husi Sua Santidade Papa Francisco ne’ebé sei vizita nasaun Timor-Leste, no apoiu seluk mós kona -ba eventu Nasionál no Internasionál Arte, Kultura no-mós Promosaun Turizmu, Paz, Desportu, Siénsia no Téknolojia ne’ebé sei realiza iha tinan ida-ne’e.
Iha okajiaun-ne’e, Ministru Interiór, mós agradese ba tulun ne’ebé durante ne’e Timór-Leste hetan husi Japaun tanba kontinua apoiu Guvernu Timór-Leste iha setór seguransa nian.
“Lori Guvernu nia naran hakarak hato’o agradesimentu ba Guvernu Japaun liuhusi embaixadór Japaun mai Timor-Leste, Tetsuya Kimura ne’ebé esforsu nafatin hodi apoiu ita iha area seguransa nian. Ita hatene katak durante tinan barak sira nafatin dezenvolve programa apoiu no kooperasaun ne’ebé foka liubá area seguransa marítima ”, afirma Ministru Francisco. #Est/Charly/Edv.
