Dili, 15 abril 2024 (SRP) – Governu liuhusi Ministériu Interior entrega ró patrullamentu rua ba Polísia Nasionál Timor-Leste (PNTL) liu husi Unidade Polísia Marítima (UPM) atu halo patrullamentu no kontrola atividades ilegais ne’ebé mak tama mai territóriu nasionál.
“Ró rua ne’e ita hola iha Indonézia, lori tinan rua nia laran no ohin ita halo serimonia entrega ba Komandu PNTL hodi ajuda UPM halo servisu patrullamentu liuliu iha parte água territoriál ninian. Agora kona-ba presu ninia orsamentu menus de 1 millaun de dolares”, esplika Francisco Guterres, iha Kuartel UPM, Bidau Lecidere, Díli segunda ne’e.
Ezekutivu ne’e hateten,Guvernu iha komprimisiu hodi moderniza UPM nune’e bele kontinua halo jestaun operasaun hodi prevene atvidade ilegál no asidente ruma liu-liu kontrola movimentu komunidade nian iha tasi.
“Planu ba futuru ita tenki halo investimentu boot ida ba UPM hodi hala’o servisu, ita prepara infraestrutura no nesesidade ida-ne’ebé di’ak ba sira, inklui prepara transporte por ezemplu ró, ho nia kapasidade ne’ebé boot, nune’e sira bele halo kontrolu mais efetivu ba ita-nia marítima ho diak liután”, afirma.
Nia hatutan, Governu iha ona hanoin ida oinsá atu investe uluk iha kondisaun infraestruturas ba UPM ho kondisaun ne’ebé naton nune’e bele halo servisu operasionál iha kosta sul no kosta norte iha água territóriál inklusivamente.
“Sim ró rua ne’e to’o ona, ita hahú distribui tan iha parte barak, por ezemplu agora ró sira ne’ebé mak iha ne’e balun ita tau iha postu vizilansia Com para balun ajuda kontrola iha Lautem, depois balun ba reforsa iha área Biacou parte Atabae nian inklui postu vizilansia Atauro para hodi bele halo kontrolu efetivu ba peskas ilegais ” nia konklui.
Hafoin halo serimonia entrega Ministru Interior akompanha husi Komandante Jeral no Segundu Komandante Jeral no membru UPM Koko Ro foun rua ne’e husi Kuartel UPM to’o area Cristu Rei. #Ekipa Media.
