DILI, 20 Marsu 2024 (SRP) – Ministériu Interior, liu hosi Gabinete Inspesaun Auditoria (GIA), fasilita formasaun Interna kona-ba sistema kontrolu internu hodi propoin medidas auditoria ligadu ho knar no deveres tuir estatutu Funsaun Públika (FP) nian, hanesan halo auditoria no fiskalizasaun iha finanseiru, administrativu no lojistika, ba servisu sira ne’ebé tutela iha Ministériu Interior.
“Atividade ne’e hanesan parte ida hosi planu GIA ba formasaun interna, ne’ebé ita fahe hodi fó hanoin nafatin funsionáriu sira iha Gabinete Inspesaun Auditoria (GIA) no Gabinete Inspesaun Auditoria Interna Autoridade Protesaun Sivíl kona-ba dever diretus no proibisoens ne’ebé hakerek ona iha estatutu Funsaun Públika nian”, informa Inspetora Jerál Gabineti Inspesaun Auditoria, Cândida do Rosario da Costa Soares, hafoin remata formasaun ne’e iha sala Migrasaun, Ministériu Interior, Vila-Verde, kuarta ne’e.
Nia dehan, atividade ne’e foka liu ba instrusaun no inkéritu sira nomeadamente iha prosesu sira ne’ebé ho natureza administrativa no disiplinar nian.
“Alem de koalia kona-ba dever, direitus no proibisoens, atividade ne’e mós koalia kona-ba responsablidade disiplina infrasaun no instaurasaun ba prosesu”, subliña.
Inspetora Jerál ne’e fundamenta, nia parte sei hare no apresia kualker keixas ne’ebé sei hato’o ba GIA, liu-liu kona-ba violasaun no irregulariedades iha ministériu nia laran hodi bele toma atuasaun no medidas ba prosesu tomak no-mós hala inkéritu no investigasaun ba kazu ne’ebé akontese.
Formasaun ne’e hetan partispasaun másimu hosi funsionáriu GIA nian hosi Ministériu Interior, Sekretaria Estadu Protesaun Sivíl, inklui Asistente Tékniku ba area Jurídiku GIA Ministériu Interior nian. (Charlly/Rival).
