EUA IHA KOMITMENTU HAMETIN PARSERIA IHA SETOR SEGURANSA INTERNA

DILI, 03 janeiru 2024 (SRP) – Ministru Interior (MI), Francisco da Costa Guterres, Ph.D, no Embaixada EUA Dili nia Enkarregadu Negósiu Marc Weinstock, hala’o sorumutuk ba dahuluk iha loron kuarta feira ne’e iha iha eskritoriu ofisial Ministeriu Interior hodi koalia kona-ba oinsa hametin kooperasaun servisu iha area seguransa interna Timor-Leste nian.

“Ohin hau mai hasoru malu ho Ministru Interior no ami koalia kona-ba oinsa atu haforsa setor seguransa no hametin parseria seguransa ne’ebe hala’o ona iha tinan barak nia laran” dehan Enkarregadu Negósiu Marc Weinstock, hafoin remata enkontru ne’e iha Ministeriu Interior, Vila-Verde, kuarta ne’e.

Diplomata EUA ne’e afirma, Estadus Unidus iha komitmentu bot hodi kontinua dezenvolve Timor-Leste nia setór seguransa iha area fronteira no maritima.

“Ami iha relasaun di’ak ho PNTL no ami fahe informasaun maizumenus semana rua liubá no ohin hau mos lori xefi nain rua hosi Embaixada EUA nian atu hasoru malu ho Ministru Interior hodi enfatiza parseria no hametin seguransa rejional” subliña.

Iha enkontru ne’e Marc Weinstock, hetan akompañamentu hosi Eric C. Sheffield nudar ofisial Seguransa Rejional no-mos Cristopher Morehouse, nudar ofisial Politika hosi embaixada EUA nian enkuantu husi parte Ministeriu Interior nian akompañha hosi Asesora Komunikasaun Sosiál, Dionisia Sávio. # (Elisa/AX)