Dili, 29 setembru 2023 (SRP)- Ekipa konjunta hosi Servisu Investigasaun Kriminál Nasionál (SIKN), Servisu Informasaun Polísia Nasionál (SIPN) liuhosi Aranha Oeste, Forsa Polísia (FP), junta ho SNI (Servisu Nasionál Intelijensia), halo vizilánsia durante loron 3 no konsege asegura joven-9 ne’ebé komete krime furtu argavadu hodi naok motór iha kapitál Dili.
Ekipa mós rekolla evidénsia motór beat kor metan rua laiha xapa matríkula inklui telemovel tolu ho marka I-phone, Samsung no Oppo hosi suspeitu sira.
Iha prosesu identifikasaun suspeitu sira deklara motorizada hirak ne’e foti iha fatin sira iha Dili laran hanesan Taibesse, Tasi Tolu no balu hosi Munisípiu Covalima. Sira mós deklara katak evidénsia balu sira fa’an ona ba ema seluk ne’ebé sira rasik lakuñese ho presu ne’ebé barratu tebes.
Suspeitu nain-9 ne’e ho inisiál RDP alias (RB), AJDS alias AD, RML, AMA, RDS, JSS, ACF, LCA no LDP. Antes ne’e suspeitu hirak ne’e komete ona kazu hanesan hadau telefone iha dalan públiku, ataka membru seguransa, sobu loja no naok telfone iha kalan wainhira ema hotu deskansa.
Xefi SIP Nasionál orienta ona ekipa konjunta dezenvolve kazu no fahe ekipa halo vizilánsia totál hodi rekolla tán evidensia seluk inklui sindikatu sira ne’ebé envolve iha kazu refere.
Oras ne’e daudaun evidensia sira ne’e iha ona PNTL nia liman, nune’e ba komunidade sira ne’ebé durante ne’e motór no telefone lakon bele mai direita iha edifisiu SIKN iha Kuartel Jerál PNTL Caicoli Dili, lori ho dokumentu komprovativu hodi halo konfirmasaun. #AX
