DGSM PARTISIPA ENKONTRU SOMTC WG BA DALA 6 IHA CAMBODIA

Cambodia, 09 maiu 2024 (SRP) – Diretora Jerál Servisu Migrasaun, Inspetora Xefi Polísia, Adelaide da Rosa, akompaña hosi Xefi Sektor Apoiu Administrativu, Julio Abilio de Sá no-mós Xefi Gabinete Relasaun Internasionál Ajente Xefi Azita Xavier, partisipa iha 6th SOMTC WG on AS, ne’ebé hala’o iha Siem Reap, Cambodia 8/5/2024.

Objetivu hosi sorumutuk ne’e hodi hametin kooperasaun rejionál no internasionál hodi halo diskusaun kona-ba mekanismu prevensaun hodi kombate kriminalidade ba arma illisitu liu-liu haree ba kontra bandu no tráfiku umanu husi autór rede krime organizadu sira.

Iha enkontru ne’e kada nasaun membru kria Grupu Traballu hodi aprezenta dadus no-mós mekanizmu ne’ebe maka halo hodi prevene aktus illisitus ne’ebé maka akontese no oinsá haree ba futuru. Enkuantu Timor-Leste partisipa hanesan observadór no halo komentariu hodi aprezenta informasaun kona-ba mekanismu no esforsu estadu nian hodi halo prevensaun no-mós fó punisaun ba autór sira tuir Lei ne’ebé mak vigora iha Timor-Leste.

Durante enkontru, delegasaun Timor-Leste, aprezenta katak prevensaun no kombate ba krime, kontrabandu no tráfiku umanu sai nu’udar prioridade aas ba Governu Timor-Leste no foin lalais ne’e asina ona akordu ida atu hametin jestaun fronteira, kontrabandu ho OIM ne’ebé hetan apoiu husi governu Austrália hodi tulun haforsa kapasidade jestaun fronteira Timor-Leste nian. #SRP