Dili, 29 Juñu 2026 (SRPM) – Ministru Interior, Francisco da Costa Guterres, Ph.D, partisipa iha Serimónia Komemorasaun Aniversáriu Autoridade Protesaun Sivil (APC-Sigla Portugés), ba dala IV, ne’ebé hala’o iha Salaun Larigutu CNE, Segunda-feira.
Iha okaziaun ne’e, APC mós organiza semináriu ida ho tema “Harii Futuru Ida Ne’ebé Rejiliente, Inovativu no Iha Adaptasaun ba Mudansa Klimátika.”
Iha diskursu enserramentu, Ministru Interior hato’o parabéns ba APC ba komemorasaun aniversáriu ba dala IV no fó apresiasaun ba servisu ne’ebé instituisaun ne’e hala’o durante ne’e. Ministru mos husu atu APC kontinua hala’o knaar ho profisionalizmu, responsabilidade no dedikasaun atu fó atendimentu di’ak liu ba povu no nasaun.
“Ita hein katak, liuhosi semináriu ida ne’e, bele loke tan partisipante sira nia hanoin no hametin mekanizmu komunikasaun no koordenasaun entre instituisaun relevante sira iha implementasaun servisu protesaun sivil,” dehan Ministru Interior.
Governante ne’e mós enkoraja APC, tenke kontinua hametin kapasidade institusionál, aumenta preparasaun no esforsu hodi hasoru situasaun emerjénsia ka dezastre naturál sira ne’ebé bele akontese iha futuru, inklui impaktu hosi mudansa klimátika.
Iha serimónia ne’e, Partisipa husi Sekretáriu Estadu ba Protesaun Sivil, Domingos Mariano Reis, Prezidente Autoriedade Protesaun Sivil, Jesuinos dos Reis Carvalho, no konvidadus sira seluk #Buy
