𝐌𝐈 𝐊𝐎𝐍𝐆𝐑𝐀𝐓𝐔𝐋𝐀 𝐌𝐄𝐌𝐁𝐑𝐔 𝐔𝐄𝐏 𝟏𝟏𝟖 𝐄𝐍𝐓𝐑𝐄𝐆𝐀 𝐀𝐓𝐑𝐈𝐁𝐔𝐓𝐔 𝐆𝐀𝐌 𝐍𝐎 𝐆𝐀𝐑 𝐁𝐀 𝐄𝐒𝐓𝐀𝐃𝐔

Dili, 06 maiu 2024 (SRP) – Ministru Interior, Francisco da Costa Guterres, Ph.D, kongratula Membru UEP, ne’ebé servisu  determinadu, prontu servisu ho profisionál no kontribui ba dezenvolvimentu nasaun ida-ne’e.

Francisco da Costa Guterres, Ph.D, hato’o nia kongratulasaun ida-ne’e, wainhira hato’o nia diskursu iha serimónia membru UEP entrega atributu GAM/GAR ba Estadu, iha Kuartel UEP-Bairro Pite, Segunda-feira ne’e,(05/05/2024).

“Ha’u kontente Wainhira bolu imi ba asina, imi hatan ho kontente tanba ita bo’ot sira eskollidu, prontu husik no hatudu nafatin servisu ne’ebé di’ak ba jovem sira ho imi nia profissionalizmu, ita bo’ot sira-nia domin no hanoin ne’ebé di’ak hadomi no servi ba estadu no povu ida-ne’e”, nia salienta.

MI mós subliña katak, ho aktu ida-ne’e, bele ajuda estadu ida ne’e hodi bele regulariza arte Marsiais sira. Tanba arte Marsiais Laos buat a’at ida, maibé membru grupu sira balun mak uza sala tiha arte marsiais hodi prejudika tiha ema seluk nia direitu.

“Ha’u husu ba membru sira ne’ebé mak inklina a’an iha arte Marsiais, maibé seidauk mai deklara an, sei iha tempu hodi bele mai deklara imi-nia a’an, tanba iha estatutu ne’ebé foun sei lá fó dalan hodi asosia iha kualker arte marsias no arte rituais. Tanba estatutu sei lori ba iha Konsellu Ministru hodi aprova. Se kuandu aprova ona, mak hetan imi kontinua aktu ida-ne’e, mak sei iha opsaun ida de’it sei sai husi Polisia” alerta.

Governante ne’e mós agradese ba Komandu Jerál PNTL liuhosi UEP ne’ebé realiza serimónia ida-ne’e tanba hahú ohin sira la’os ona pertense ba grupu seluk.

Entertantu Membru Unidade Espesiál Polisia-UEP nain 118 ne’ebé entrega Atributu GAM/GAR ba Estadu liuhosi Ministériu Interior ne’e, Kompostu husi Persaudaran Setia Hati Terate-PSHT hamutuk 60, Ikatan Kera Sakti-IKS hamutuk 29, Organizasaun Kmanek Wain Rai Klaran-KORK hamutuk 15 no Arte Ritual-77 hamutuk 14.

Bazeia ba Konstituisaun RDTL, Artigu 147 kona-ba Polísia no Forsa Seguransa sira nomós Despaisu Nu. 125/G-MI/XII/2023, data 13 Dezembru 2023, Despaisu ba identifikasaun no desvinkulasaun ba Polísia Nasionál Timor-Leste hotu ne’ebé inklina a’an iha grupu Arte Marsiais no Arte Rituais.

Serimónia ne’e konta prezensa Ministru Juventude, Desportu, Arte no Kultura, Nelyo Isaac Sarmento, Sekretariu Estadu Protesaun Sivíl, Domingos Mariano Reis, Presidente Komisaun B Parlamentu Nasionál, Domingos Augusto, Komandante Jerál PNTL, Komisáriu Jerál, Henrique da Costa, Segundo Komandante Jerál, Komisáriu Jerál Pedro Belo, Komandante Unidade sira, Reprezentante Autoridade Munisípiu Dili, Prezidente KRAM Octaviano da Conceição, Autoridade Lokál Xefe Suku no Xefe Aldeia no joven husi suku Dom Aleixo inklui bainaka importante sira. #SRP