𝐌𝐈𝐍𝐈𝐒𝐓𝐄́𝐑𝐈𝐔 𝐈𝐍𝐓𝐄𝐑𝐈𝐎𝐑 𝐒𝐄𝐈 𝐇𝐀𝐋𝐎 𝐌𝐔𝐃𝐀𝐍𝐒𝐀 𝐁𝐀 𝐊𝐀𝐑𝐆𝐔 𝐗𝐄𝐅𝐈𝐀 𝐈𝐇𝐀 𝐓𝐄𝐌𝐏𝐔 𝐁𝐄𝐒𝐈𝐊

Dili, 22 abril 2024 (SRP) – Ministru Interior, Francisco da Costa Guterres, Ph.D, hala’o enkontru ho kargu diresaun xefia sira hodi ko’alia kona-ba mudansa ba Funsionáriu ho kargu Diretores Jerais, Diretór Nasionál no Xefi Departamentu sira iha Ministériu Interior.

“Ohin ha’u bolu imi hotu mai ita halo reuniaun nasionál ho kargu xefia sira para hahú prosesu reestruturasaun ba kargu xefia sira hosi hadi’a estadu no povu ida-ne’e. Ita halo reestruturasaun foun para halo servisu ne’e ho di’ak tanba estadu selu ita mai atu halo servisu laos halo kontente malu”, esplika Ministru Francisco, perante nia diskursu iha Salaun João Paulo II Konventu Madre Salesiana Filhas de Maria Auxiliadora (FMA) Comoro Dili.

Nia dehan, estadu presija ema atu servisu ho pensamentu mudansa ho kreativu, inovativu iha funsaun públika hodi apoiu servisu Ministru Interior tuir programa IX Governu Konstitusionál nian.

“Nasaun ida-ne’e presija ema atu kumpri ordem leál ba estadu laos mai atu koalia rungu ranga malu. Ha’u laos ema foun ita bo’ot sira tama ikus lakuñese ha’u, maibé sira hosi 2007 to’o 2015 kuñese ha’u. Momentu ne’eba ita reestrutura buat barak tanba ne’e ha’u iha obrigasaun mai atu hadia imi. Hau fulan sia iha ne’e haree no rona buat barak tanba ne’e tempu ona atu hahú rezolve problema hirak ne’e”, afirma.

Governante ne’e klarifika katak mudansa ne’e depende ba profesionalizmu no prestasaun servisu liu-liu ba konvinensia servisu hodi kumpri loloos responsabilidade dever no direitu.

“Bolu imi mai ne’e atu prepara imi-nia an kuandu naran sai no públika ona iha jornál repúblika sei mai simu pose iha Dili. Ha’u husu se mak asumi responsabilidade karik haree tau matan ba ema sira iha kraik, mezmu balu lakaer kargu xefia kolabora nafatin hodi entrega servisu ho diak, sira ne’ebé mak mantein halo diak liután”, tenik tan.

Governante ne’e kontinua husu ba hirak ne’ebé hetan nomeasaun atu servisu ho integridade loyalidade, disiplina no ho komitmentu ba servisu ne’ebé simu ho responsabilidade.

“PNTL ita desvinkula ona hosi Grupu Arte Marsiais no Rituais, semak nafatin la kumpri haree sai, tanba PNTL iha atu asegura povu, estadu no nasaun. Atividade ida-ne’e mós ita sei halo ba funsionáriu públiku sira selae to’o tempu ida grupu ne’e maka manda fali ita. Imi sira iha ne’e mós prepara an tanba to’o tempu ida sei disvinkula imi hotu. Ba Rekursu umanu no sira ne’ebé kaer kargu xefia tenke haree asuntu sira ne’e, prepara hela indikadór dezempeñu para ita sukat malu”, alerta.

Ezekutivu ne’e mós husu ba diresaun jerais tolu atu iha kapasidade hodi halo kombinasaun husi Funsionáriu hotu no utiliza didiak rekursus umanus ne’ebé iha ho másimu, nune’e bele hetan produtividade liuhusi servisu unidade ho pensamentu servisu iha ekipa hodi fó rezultadu ne’ebé di’ak ba nasaun no povu Timor-Leste.

“Husu ba Diretores Jerais sira atu ko’alia deit nivel tékniku nian maibé polítika Ministériu nian husik ba Ministru. Agora ba funsionáriu púbiku sira ne’ebé tutela diresaun jerais tolu hahú kedas hosi nasionál to’o munisipál tenke preparadu simu desijaun. Sé dezempeñu servisu ladiak tau fali ema seluk tanba ita presija ema halo servisu lao ba oin”, nia fó hanoin.

Antes remata, Francisco Guterres, husu ba Funsionáriu sira tenki sensitivu, responsivu ba kualker dezafiu no problema ne’ebé mosu, iha koñesementu no vizaun dook hodi ultrapasa ho pensamentu kreativu, inovativu ba interese nasaun nian.

“Ida-ne’e importante ba ita bo’ot sira katak, ha’u servisu temporariu deit durante tinan lima nia laran maibé imi mantein responsabilidade atu kaer servisu ho diak serve estadu ida-ne’e”, hakotu.

Enkontru ne’e hetan partisipasaun hosi Asesór Nasionais, Diretores Jerais, Diretores Nasionais no-mós Xefi Departamentu no seksaun sira hosi 12 munisípiu inklui Rejiaun Administrativa Espesiál Oecusse –Ambeno (RAEOA). # Ekipa SRP