Bobonaro, 3 maiu 2024 (SRP)- Membru Polísia Nasionál Timor-Leste nain 17 ne’ebé halao kna’ar iha komandu Munisípiu Bobonaro nian, entrega ona ekipamentus GAM nian ba estadu liuhusi Ministériu Interior, iha resintu Komandu Jerál Munisípiu Bobonaro, Sexta-feira ne’e, hodi asegura servisu profesionalizmu, lealdade iha territóriu nasionál.
Hafoin remata serimónia iha edifísiu Komandu Jerál Munisípiu Bobonaro sexta-feira ne’e, Ministru Interior Francisco da Costa Guterres hateten ba jornalista sira katak, kontinuasaun husi serimónia ne’e hala’o uluk ona iha Palásiu governu iha tinan kotuk.
“Ami halo tiha ona, primeira serimónia ami halo iha loron 7 fulan dezembru tinan 2023 iha Palácio do Governo, polítika governu nian atu sirkula tiha hotu membru PNTL ne’ebé mak envole iha arte marsiais, ne’ebé lori problema ba nasaun ne’e, ho mós arte rituais sira, tanba ne’e mak polítika ida-ne’e lao hela, Ita halo iha fatin barak ona, Bobonaro mós halo, tanba governu ida-ne’e hakarak kongratula Munisípiu Bobonaro, Komandu Munisípiu ida-ne’e, membru sira hotu ne’ebé mak organiza eventu ida-ne’e, eventu importante teb-tebes, ba Ita-nia simbolu , simbolu ne’ebé importante para povu atu hatene, katak Polísia serví neutru, laos atu tama organizasun ne’ebé de’it, maibé sira atu serví de’it povu no nasaun ne’e, ida-ne’e mak ita halo no kontinua ho ida-ne’e iha fatin seluk”, ezekutivu ne’e komenta.
Governante ne’e afirma tan katak, sira seluk ne’ebé iha bele mai entrega, to’o ninia prazu atu termina, kuandu estatutu aprovadu, determina ona data, wainhira liu ida-ne’e, hetan membru ida mak envolve, laiha opsaun ba nia, opsaun mak sai, tanba nia la onestu ba estadu, governu, ema sira mate ne’e, no nia an rasik, tanba membru PNTL tenki onestu hodi sevi povu ida-ne’e ho di’ak liu.
Liuhusi serimónia ne’e, governante ne’e agradese membru PNTL sira ne’ebe ho voluntariamente entrega ekipamentus GAM ba estadu liuhusi Ministeriu Interior.
”Em nome do governo, hakarak hato’o agradese tanba membru hirak ne’e hatudu ona ezemplu di’ak ba membru sira seluk hodi halo tuir, no mós agradese ho komandu no ninia membru sira hotu, konsege voluntariamente entrega ona atributu GAM ne’ebé ohin realiza iha resintu Komandu Munisípiu Bobonaro husi Komisáriu Jerál PNTL, Prezidenti CRAM, reprezentante Administradór Bobonaro, Unidade Polísia Fronteira, Komandante BOP Munisípiu, Segundu Komandante Protesaun Sivíl, Diretór Nasionál no Munisípiu, Inklui mós entidades husi Autoridades Munisípiu Bobonaro nian.
Ikusliu, mensajem husi governante ne’e “Em primeiro Ha’u hakarak hato’o parabéns ba sira, sira mai dezvinkula sira-nia an, voluntariamente entrega sira-nia atributus, husu ba sira atu serví nafatin, sira lalika preokupa, no tauk atu ema dun fali sira, ne’e ezemplu atu tau pontu ’plus’ ida ba sira, sira hatudu sira-nia onestisdade, servisu nafatin ho profesionál, atu hatudu ba sira seluk katak sira hakarak dunik estadu ne’e lao ho di’ak”, MI konklui.
Hafoin remata serimónia entrega atributu GAM, Ministru Interior, Fransisco da Costa Guterres, halao mós nia vizita ba iha Diresaun tutela sira, hanesan DNSPP, DNPKK, Bombeiros, hodi haree kondisaun ba edefisiu hirak ne’ebé iha, no halo mós enkontru ho diresaun tutela sira iha salaun enkontru DNSPP Bobonaro.
Iha enkontru refere Ministru Interior, Fransisco da Costa Guterres fokaliu ba kompromisu balun, kna’ar no responsabilidade pesoál atu mantein servisu ho profesionalizmu, hatudu vontade servisu ho diak liután, hodi serví rai ida-ne’e hodi garante servisu di’ak,hodi serví povu no estadu ida-ne’e. #Rival/Edwin
