𝐆𝐔𝐕𝐄𝐑𝐍𝐔 𝐉𝐀𝐏𝐀𝐔𝐍 𝐒𝐄𝐈 𝐀𝐏𝐎𝐈𝐔 𝐒𝐏𝐄𝐀𝐃 𝐁𝐎𝐀𝐓 4 𝐁𝐀 𝐔𝐍𝐈𝐃𝐀𝐃𝐄 𝐏𝐎𝐋𝐈𝐒𝐈𝐀 𝐌𝐀𝐑𝐈𝐓𝐈𝐌𝐀

𝐃𝐢𝐥𝐢, 𝟏𝟖 𝐟𝐞𝐯𝐞𝐫𝐞𝐢𝐫𝐮 𝟐𝟎𝟐𝟓 (𝐒𝐑𝐏) – Ministru Interior, Francisco da Costa Guterres, Ph.D, hala’o enkontru ho Embaixadór Japaun iha Timor-Leste, Tetsuya Kimura, hodi koalia kona-ba kooperasaun iha area seguransa nian liu-liu kapasitasaun ba PNTL (Polísia Nasionál Timor-Leste)-Unidade Polísia Marítima (UPM) inklui formasaun ba ofisiais PNTL sira iha futuru.

Embaixador Japaun, hateten objetivu hosi enkontru ne’e hodi hare fila fali asuntu hirak ne’ebe antes ne’e iha ona hodi bele apoia iha seguransa maritima nian liu-liu kooperasaun bilaterál entre nasaun rua hodi hametin servisu seguransa iha futuru.

“Hau mai hasoru Ministru Interior, hodi halo diskusaun atu hare fila fali asuntu hirak ne’ebe ami koalia ona iha tinan kotuk, oinsa maka ami bele apoia iha seguransa maritima nian hodi apoiu lancha multifunsaun (spead boat) hamutuk-4 ba Unidade Polisia Maritima. Agora Iha fulan Dezembru liu ba, ofisiál sira husi guarda kosteira Japaun nian mai ona iha Timor-Leste hodi halo kolaborasaun servisu ho ofisiál timoroan sira liu hosi programa JICA (Japan International Cooperation Agency) nian”, esplika, Tetsuya Kimura, hafoin remata enkontru iha Ministeriu Interior, Vila-Verde, tersa, (18/02/2025).

Nia dehan, governu Japaun iha komitmentu servisu hamutuk atu promove konseitu seguransa hodi asegura dezenvolvimentu ekonómiku iha nasaun ne’e.

“Ami mos follow up kooperasaun ne’ebe antes ne’e halo ona hodi apoia tan Polisia Komunitaria (POLKOM) liu hosi formasaun no-mos redusaun risku dezastre nian ne’ebe ita servisu hamutuk ho IOM (International Organization for Migration)”, akresenta.

Diplomata Japaun ne’e hatutan, antes ne’e nia selebra ona akordu ho Sekretáriu Estadu Protesaun Sivíl (SEPC), Domingos Mariano Reis, kona-ba projeitu asistensia subvensaun foun ba seguransa umana hodi responde ba nesidade povu nian, liu-liu komunidade sira ne᾽ebe mak afeita ba dezastre naturais.

“Iha semana kotuk ha’u asina ona ona protokolu kooperasaun hodi fornese kareta lima ba Autoridade Protesaun Sivil (APC) hodi responde ba nesidade komunidade sira nian”, fundamenta.

Enkuantu iha asinatura protokolu kooperasaun ne’e Guvernu Japaun sei fornese kareta bombeiros auto tanki -4 no auto escada -1 inklui mos osan dolar rihun $333,987 ba APC nune᾽e hodi bele distribui ba iha Bombeiros iha Munisipíu Lautem no Dili.

Iha okajiaun-ne’e, Ministru Interiór, Francisco da Costa Guterres, agradese ba tulun ne’ebé hetan husi Guvernu Japaun tanba kontinua apoiu Guvernu Timór-Leste iha iha setór seguransa nian.

“Hakarak hato’o agradesimentu ba Guvernu Japaun liuhusi Embaixadór iha Timor-Leste ne’ebé ho laran luak apoiu ita iha area segurasa nian liu-liu atu suporta kna’ar Polísia Marítima, Polisia Komunitaria no-mos Autoridade Protesaun Sivil sira, tanba ho apoiu hirak ne’e bele halo servisu operasional hodi responde ba krime no protesaun seguru iha area marítima nian nomos dazastre ruma ”, hateten Ministru Francisco. #Bui_ Rival