Dili, 9 maiu 2024 (SRP) – Ministru Interior, Francisco da Costa Guterres, Ph.D, hala’o enkontru ho ekipa veteranu sira-ne’ebé atu desloka ba Rwanda, hodi haree kona-ba programa balun ne’ebé relevante tebes mai ita-nia nasaun Timor-Leste.
“Ohin ekipa veteranus nain 17, kompostu husi Ministérius diferentes, mak hanesan Ministériu Defeza, Administrasaun Estatal no Turizmu apoiu husi g7+ kordena ho Ministériu Interior sei hala’o viajen ba nasaun Rwanda hodi halo estudu komparativu ho nasaun refere ninia dezenvolvimentu no rezolusaun konflitus no-mós asuntu sira seluk”, esplika Vise-Ministru Administrasaun Estatal, Jacinto Rigoberto, nudar mós xefi delegasaun, hafoin remata enkontru ne’e iha Ministériu Interior, Vila-Verde, kinta (09/05/2024).
Nia dehan, razaun hili Rwanda tanba nasaun ida-ne’e iha tinan 1994 foin sai husi konflitu, maibé agora sai nasaun ida-ne’ebé avansadu tebes.
“Entaun entre Ministériu Interior ho g7+ indika ha’u ata nu’udar Vise Ministru husi Adminstrasaun Estatal, atu haree oinsá sira-nia governasaun, jestaun lixu, governu elektróniku, hanesan foin daudauk MAE lansa iha Manatutu kona-ba Balkaun úniku, entaun programa sira ne’ebé mak ami atu ba haree ne’e, relevansia tebtebes mai ita-nia rai”, fundamenta.
Tuir nia, ekipa ne’e maioria mesak vetranus de’it no envolve mós Prezidente Autoridade Turizmu, Sekretariu jeral g7+ no-mós veteranus seluk.
“Programa mesak importante, relevante tebes ba ita-na interese, tanba ba ne’ebá sei hasoru entidades altas lubuk ida, hanesan parte Ministériu Justisa, Ministériu Interior, Ministériu, Administrasaun Estatal ninian no parte husi veteranus nian ne’ebé halai ba rezolusaun konflitu para simu malu lalais”, subliña.
Governante ne’e salienta, tuir planu ekipa hamutuk ema nain 17 sei desloka husi Dili iha loron sábadu 11 maiu 2024 no sei fila fali mai Dili iha loron 20 maiu tinan ne’e. #SRP
