Dili, 04 Marsu 2024 (SRP) – Ministru Interior, Francisco da Costa Guterres, Ph.D, akompaña husi Sekretáriu Estadu Protesaun Sivíl, Domingos Mariano Reis sai Inspetór ba Serimónia Isar Bandeira Nasionál semana dahuluk, iha edifísiu Ministériu Interior, Vila-verde, Segunda-feira ne’e.
“Dia 3 marsu horseik ita selebra loron nasionál veteranu hodi fó hanoin mai ita atu hatutan sira-nia mehi hodi hametin ita-nia rai. Hanesan jerasaun foun haree muda mentalidade hodi kontribui ba rai ida-ne’e”, dehan MI.
Perante diskursu, Ministru Francisco, husu atu ema hotu halo mudansa ba karakter no attitude hodi sai hosi siklu konflitu wainhira mosu problema tenke rezolve ho diálogu.
“Tuir mai kona-ba servisu ita hahú ona ho reestrutusaun no imi tenke prontu halo servisu ida-ne’e. Tanba ne’e informa ba imi hotu tenke preparadu ho reestrutusaun ne’ebé sei mosu mai para responde ba kondisaun iha kraik. Husu ba imi hotu servisu ho disiplina, pontualidade, respeita ierarkia. Hau hatene katak servisu ida-ne’e todan maibé ita tenke avansa hodi hadia Ministériu ida-ne’e lao ho diak nune’e fó netik benefiisu ba povu ida-ne’e”, dehan nia.
Governante ne’e alerta ba funsionariu hotu iha Ministériu Interior atu labele buka hatun malu, tanba hahalok hirak ne’e maka sai obstaklu no atrazu ba dezenvolvimentu rai ida-ne’e.
“Ita ne’ebé mak moris hela, haree sira-nia luta oinsá bele servi rai no povu ida-ne’e, ba veteranu sira ne’ebé sei moris hela, sira ho lian ida deit, luta ba liberdade povu ida-ne’e, luta ba ukun rasik aan, atu nune’e bele lori moris no hakmatek ba ita-nia povu ida-ne’e”, Iha fulan Marsu ne’e, sei hamosu estrutura regulamentar orgánika, hodi hala’o servisu iha nasionál to’o munisípiu, ha’u husu ba imi hotu, tenke prontu hodi avansa ho estrutura servisu ida-ne’e, hodi fó benefísiu di’ak ba Ministériu ida-ne’e.
Iha PNTL servisu no situasaun la’o ho di’ak, mais presiza halo re-estruturasaun ida, ba polísia no ita hotu sei kona, sei re-organiza fali hodi responde ba situasaun sira ne’ebé la’o hela.
“Ha’u husu ba imi hotu, tenke preparadu ba kualker estrutura, wainhira mosu iha Ministériu ida-ne’e, ba dirijenti sira ne’ebé mak diriji diresaun no departamentu sira tenke servi no jere ho didi’ak, ba sira ne’ebé mak tempu to’o ona, tenke servisu nafatin ho onestidade”.
Governante ne’e enkoraja funsionáriu sira kontinua hala’o servisu hodi hakat nafatin ba oin ho di’ak, wainhira servisu la’o ho di’ak, di’ak ba imi-nia aan, nomós ba estadu, estabilidade pas ba rai ida-ne’e.
Orgaun Superiór Administrasaun Públiku, agradese ba Polísia, Bombeiros, Migrasaun Seguransa Sivíl ne’ebé servisu ho di’ak, nia husu mantein nafatin disiplina, hodi prepara an hasoru eventu bo’ot ida, iha fulan agostu nia laran kona-ba eventu Nasionál no Internasionál kona-ba Arte, Kultura no-mós Promosaun Turizmu, Paz, Desportu Siénsia no Téknolojia ne’ebé sei organiza husi Prezidénsia Repúblika. #Fatinha/Charlie/ Abui.
